بسم الله ..

المصالح الحكومية و هيئات تخليص الاوراق والبيانات اللازمة لاعدادات المرور والجيش و الأقسام و الضرايب والتأمينات داخل مصر ، اشتهرت المصالح دى بالطوابير ،بحيث كل اما تروح اى مكان منهم لازم تقف طابور طويل علشان تخلص الورقة الى انت عايزها والورقة اما بتكون شهادة ميلاد او شهادة بيانات او تصريح او محتاج توثيق او ختم ألخ …

ومن المعروف عن المصالح الحكومية ان الورقة الواحدة علشان تطلع بتاخدلها يوم كامل ،  وأقربهم كنت امبارح فى مرور حلوان بدفع المخالفات للعربية بتاعتى ، فلاقيت ان المفروض أطلع الأول شهادة بيانات للمخالفات من مرور التبين وبعد كده أروح ادفع المخالفات فى نيابة مرور حلوان ، وكل مرور من دول بتبقى فيها عدد ضخم من ناس كتيرة سايبة أشغالها و مصالحها علشان تجدد أو ترجع الرخصة المسحوبة أو تدفع أو تغير نمر والا لو مشيت فى الشارع من غير المشوار ده بتتسحب رخصتها فى الشارع من أقرب أمين شرطة يقابلهم ، ومش بيرضى يسيبهم فى حالهم الا لو خد 100 جنيه على الأقل ، وطبعا ده حال العربيات النقل ،مع المروروالشوارع ، متهيألى كلنا عنينا من الموضوع ده ومافيش حد ما عداش على مصالح حكومية ابل كده ، انا والله اعرف ناس مضيعة عمرها واقفة فى الطوابير وأقربهم أنا عدى عليا حوالى 3 شهور كل يومين فى مصلحة شكل بخلص وررقة معينة سواء للضرايب او التامينات او المرور ، سجل مدنى ، هايك استيب .. بس أحلى حاجة فى كل ده انى اتعودت امشى بالمصحف دايما فى جيبى ، علشان كل اما يجى طابور اطلع واقرى  ألخ …

الخلاصة من الموضوع ده انى بحلم بفكرة لتوحيد جميع المصالح الحكومية تحت قاعدة بيانات واحدة ، بحيث أى كمبيوتر فى أى مكان ممكن يخلص ورق ومصالح الناس ، فيها ايه مثلا لو كنت وانا فى المرور كده لاقيت اسمى طلع على الكمبيوتر وقالى حضرتك دفعت الضريبة بس لسه المخالفات ، والمخالفات كذا وكذا والحمد لله ما طلعش عليا مخالفات لما روحت المرور بس دفعت 10 جنيهه حق استخراج الاعفاء .

تعاملت مع مصالح حكومية كتير جدا ودارس لنظمهم جيدا ، ولما كنت بقدم ورق الجيش بتاعى كنت أعد فى الهايك ستيب بملى ورق المتقدمين للتجنيد من داخل القيد العائلى (لأنى كنت مقدم على معافاة بسبب وفاة والدى) بدون الرجوع لأوراق أخرى .

أنا متطوع مجانا برسم تحليل تفصيلى لقاعدة بيانات كاملة تحمل كل بيانات الشعب المصرى بما يخصه من مصالح ورخص وشهادات ميلاد وضرايب و تأمينات وتعليم وبطايق وجيش وكل حاجة .. بحيث نحل مشكلة الطوابير لأن بجد الحال ده يحزن وعيب على عقليتنا وحضرتنا الى عمرها 7000 سنة تبقى اخرتها كلها  جهل وغفلة وطوابير..

هل من مسئول يدعمنى ؟